Ihanda ang patuluyan mo

Nagsisimula ang 5‑star na pamamalagi sa pagtuon sa pinakamaliliit na detalye sa patuluyan mo. Kapag kaaya‑aya ang patuluyan mo, magiging maganda ang mga unang review sa iyo.

Iminumungkahi ng mga matagumpay na host na gawin ang tatlong bagay na ito para mapanatiling malinis ang patuluyan mo:

• Pagtuunan ang mga parte ng tuluyan na madalas galawan. Punasan ang ibabaw ng mga counter, linisin ang mga drain, at salinan ulit ang mga bote ng sabon. Siguraduhing walang naiwang buhok.

• Linisin ang bawat kuwarto. Buksan ang mga bintana, alisan ng alikabok ang mga ibabaw, at linisin ang lahat ng sahig, kasama ang ilalim ng muwebles. Lagyan ang mga higaan ng mga bagong labang linen at maglaan ng malilinis na tuwalya para sa bawat bisita.

• Gumawa ng checklist sa paghahanda ng tuluyan. Sundin ang nakatakdang gawain bago ang bawat pag‑check in para maiwasang may mapalampas.

“Nagtatakda ako ng palugit na anim na oras sa pagitan ng mga booking para masusi kaming makapaglinis,” sabi ni Daniel, isang miyembro ng Host Advisory Board at Superhost sa Canary Islands, Spain. “Kailangang nakahanda ang patuluyan gaya mismo ng nakasaad sa listing mo online.”

Inaasahan ng mga bisita na may mga pangunahing amenidad sa patuluyan mo. Narito ang mga iyon:

• Toilet paper
• Sabon (pangkamay at panligo)
• Isang tuwalya kada bisita
• Isang unan kada bisita
• Mga linen para sa bawat higaan ng bisita

Tulungan ang mga bisita na maging komportable sa pamamagitan ng pagbibigay ng mga kailangang gamit sa bawat kuwarto, gaya ng:

Kusina

• Mga gamit sa hapag‑kainan para sa itinakda mong maximum na bilang ng bisita
• Coffee maker, takure para sa tsaa, mga kaldero't kawali, at mga kagamitan sa pagluluto
• Asin, paminta, at mantika
• Sabong panghugas, patuyuan, at pamunas na tela o paper towel

Sala

• Mauupuan para sa itinakda mong maximum na bilang ng bisita
• TV na may streaming service
• Manwal ng tuluyan na may mga tagubilin kung paano gamitin ang mga aparato

Banyo

• Mga pamunas ng kamay at mat sa banyo
• Pangkuskos at pambomba ng inodoro
• Shampoo, conditioner, at hair dryer

Kuwarto

• Mga tabing sa bintana at mesa sa tabi ng higaan na may lamp
• Mga drawer o hanger para sa mga damit, at lalagyan ng bagahe
• Ekstrang kumot at bentilador o space heater

Kapag naihanda mo na ang patuluyan mo, mamalagi roon nang isang gabi o hilingin sa mga kaibigan na mamalagi roon at magbigay ng feedback. Mabilis mong malalaman kung ano ang kulang.

Natutuwa ang mga bisita kapag may pagpapahalaga ang mga host hanggang sa pinakamaliliit na detalye at kapag nag‑aalok sila ng mga karagdagang bagay para maging mas komportable ang pamamalagi. Puwedeng kasama sa mga ito ang mga ear plug, cotton bud, board game, power adapter, at anumang partikular sa lokasyon, gaya ng mga payong o beach towel.

Ayon sa maraming bihasang host, ganito ang ginagawa nila:

• Magbigay ng pambungad na regalo. Mag‑iwan ng sulat‑kamay na mensahe, basket ng mga lokal na produkto, o anumang para sa pagdiriwang ng espesyal na okasyon.
• Gumamit ng dekorasyong nakakagaan ng pakiramdam. Pag‑isipan kung ano ang nakakatulong sa iyong mag‑relax kapag bumibiyahe ka. Puwedeng maging komportable at magkaroon ng dating ang patuluyan kapag naglagay ng obra ng sining sa pader, mga halaman, at mga throw pillow.
• I‑print ang manwal ng tuluyan. Ilagay ang manwal kung saan iyon madaling mahahanap ng mga bisita, gaya sa ibabaw ng counter.
• Bigyang‑diin ang mga espesyal na feature. Sa paglalarawan ng listing mo, isaad ang anumang iniaalok mo na nakakatugon sa mga partikular na pangangailangan, gaya ng nakatalagang workspace o mga accessibility feature.

“Mayroon akong pack ’n play, high chair, at mga libro't laruan,” sabi ni Elsie na isang host sa Nashville, Tennessee.

Kung gusto mo pa ng mga tip at wala pang nagbu‑book sa iyo, puwede kang makatanggap ng iniangkop na patnubay ng Superhost. Sila ang mga pinakabihasang host sa Airbnb na may pinakamatataas na rating.

Posibleng nagbago ang impormasyong nakasaad sa artikulong ito mula noong na‑publish ito.