Pano kumikita ang Airbnb host na si Brenda para sa kanyang pagreretiro

Mainit na tinatanggap ng Airbnb host na si Brenda ang mga bisita sa ikalawang patuluyan niya sa kapitbahayan ng Gentilly sa New Orleans. Ipinanganak at lumaki si Brenda sa New Orleans at ipinagmamalaki niyang ipakilala sa mga biyahero mula sa iba't ibang panig ng mundo ang kanyang tuluyan at lungsod. "Nanirahan ako rito sa loob ng 66 na taon at 32 taon ko nang pag-aari ang property na ito," sabi niya. "Nag-aral ako sa mga pampublikong paaralan sa New Orleans, at nasisiyahan akong ipakita ang aking lungsod sa mga tao." Nang lumipat siya kasama ang kanyang pangalawang asawaa, ayaw ni Brenda na ibenta ang bahay kung saan niya binuhay ang kanyang pamilya. Sa pamamagitan ng pagho-host, nakayanan niyang panatilihin ang tahanan at suportahan ang sarili niya sa pagreretiro.

Natuklasan ni Brenda ang Airbnb noong tinutulungan niyang maglipat ang kanyang anak sa Spain. “Namalagi kami sa tuluyan ng isang babae, at talagang mabait siya sa amin. Tinulungan pa niyang maglipat ang anak kong babae sa kanyang tirahan. Isa iyong nakapagandang karanasan, at naisip ko na 'kaya kong gawin iyon para sa iba.'” Ngayon ay ginagawa na niya ito. Kapag dumating ang mga bisita, binibigyan sila ni Brenda ng welcome package na may mga meryenda at rekomendasyon. Tinitiyak din niyang alam nila kung saan pupunta at kung paano susulitin ang buong lungsod. "Ibinibigay ko sa kanila ang maiksing talumpati bilang 'Miss Brenda." Sabi nga ng isa kong bisita, parang nakikituloy siya sa bahay ng paborito niyang tiyahin."

Gustong-gusto ni Brenda na ibahagi ang kanyang kaalaman sa mga lokal na lugar sa mga bisita at itinuturo sila sa mga lugar na hindi bahagi ng karaniwang karanasan sa New Orleans. "Palagi kong inirerekomenda na pumunta ang mga tao sa Lakefront Airport kung saan pumapasok ang mga pribadong eroplano. Nariyan ang pinakamagandang maliit na restaurant doon na tinatawag na Messina's—kung saan inihahain ang pinakamasarap na pancake sa buong mundo. Kapag umorder ka ng dalawa, sobrang dami na noon dahil kasing-laki iyon ng plato," natatawang sabi ni Brenda. "At pagkatapos ay inirerekomenda ko ang Sassafras, kung saan matitikman ang pinakamalinamnam na gumbo sa New Orleans. Gumagawa sila ng sarili nilang gumbo araw-araw."

Nakikita ni Brenda ang pagsuporta ng kanyang mga bisita sa mga lokal na negosyo gamit ang perang natipid nila sa pamamalagi sa kanyang Airbnb. "'Yung mga taong namamalagi sa aking tuluyan, maaaring wala silang $600 para manatili sa hotel sa downtown sa loob ng tatlong araw pero kung ano ang mayroon sila, ginagastos nila iyon sa New Orleans. Kaya ginagastos ng [mga bisita] ang kanilang pera sa mga tindahan, at nagdaragdag sila sa ating ekonomiya.”

Para kay Brenda, isang paraan ang pagho-host para mapanatili niya ang kanyang tahanan at matugunan ang araw-araw na pangangailangan. Kinailangan ni Brenda na magretiro nang maaga mula sa kanyang trabaho dahil sa matinding pinsala sa katawan na bumago sa kanyang buhay. “Inoperahan ako sa aking leeg, at hindi na ako makapagtrabaho pa.” Pagkatapos ng Hurricane Katrina, naging higit pa sa doble ang kanyang mga rate ng insurance at buwis sa ari-arian. "Mataas ang singil sa tubig, kuryente, bayad sa insurance at buwis sa ari-arian, kaya ano pa ang matitira sa iyo? Ang mga kaibigan at pamilya mo, sila na lang ang natitira."

Nakapagbigay ng mahalagang pagkakakitaan ang pagho-host para mabayaran ang malalaking gastusing ito. "[Ang pagho-host] ang tanging pinagmumulan ng aking kita, iyon at Social Security." Nag-aalala si Brenda na maaaring magpasya ang lungsod na kunin ito sa kanya. Kung permanenteng ipagbabawal ng lungsod ang mga permit para sa panandaliang pagpapagamit ng buong tuluyan sa mga residensyal na lugar, "sobrang nakakalungkot iyon, at hindi ko alam kung ano ang gagawin ko. Bukod pa rito, mas nababahala ako tungkol sa kung paano bubuuin ng lungsod ang kita na iyon, ang kita na nakukuha nito mula sa mga panandaliang matutuluyan. Malaki ang magiging epekto nito sa aking kita. Sobrang nakakadismaya lang ang lahat."

Sa huli, umaasa si Brenda na gagawa ang lungsod ng makatwirang desisyon para payagan ang mga taong tulad niya na may pansamantalang permit para sa panandaliang matutuluyan, o pangalawang tahanan, na magpagpatuloy sa pagho-host ng kanilang mga listing ng buong tuluyan. "Sana magdesisyon sila pabor sa mga indibidwal na may-ari ng tuluyan, mga taong matagal nang naninirahan dito gaya ko." Sa pamamagitan ng mga patas at makatwirang regulasyon sa panandaliang matutuluyan, puwedeng patuloy na kumita si Brenda para matugunan ang mga pangangailangan at patuloy na maging natatanging ambassador ng kanyang lungsod.

Posibleng nagbago ang impormasyong nakasaad sa artikulong ito mula noong na-publish ito.