Siguraduhing handa ka kapag kinailangan ka ng mga bisita

Nakasalalay sa napapanahon at malinaw na pakikipag‑ugnayan ang pagho‑host na binibigyan ng limang star. Ayon sa mga bisita, mahalaga para sa kanilang makatanggap ng mga kapaki‑pakinabang na tagubilin at mabibilis na tugon. “Kapag maganda ang komunikasyon, nararamdaman ng mga bisita na inaasikaso sila, at iyon ang pinakamahalaga sa pagho‑host,” sabi ni Sadie na isang Superhost sa Santa Fe, New Mexico.

Sikaping ibigay ang impormasyong kailangan ng mga bisita kung kailan nila kailangan iyon.

Maraming binabalanse ang mga tao kapag bumibiyahe sila. Subukang magbigay ng kapaki‑pakinabang na impormasyon sa tamang pagkakataon nang hindi binibigyan ang mga bisita ng sobra‑sobra kaysa sa madali nilang maaalala.

• Gumamit ng mga nakaiskedyul na mensahe. Sa pamamagitan nito, makakapagbahagi ka ng mga partikular na detalye kung kailan malamang na gustong matanggap ng mga bisita ang mga iyon. Halimbawa, maraming host ang nagsasama ng mga direksyon papunta sa patuluyan nila sa nakaiskedyul na pambungad na mensahe isang araw bago ang takdang pag‑check in.

• Sumulat ng detalyadong manwal ng tuluyan. Magsama ng malinaw na gabay kung saan mahahanap ang mahahalagang bagay, at mga tagubiling may sunod‑sunod na hakbang para sa mga aparato at kasangkapan.

• Magpaskil ng kapaki‑pakinabang na impormasyon sa iba't ibang bahagi ng tuluyan. Puwede kang maglagay ng mga tagubilin sa pagpapatakbo malapit sa thermostat at ihawan sa labas, pati sa manwal ng tuluyan mo. Kung may mga detalyeng kailangan ang mga bisita, dapat makuha nila ang mga iyon nang hindi na nila kailangang maghanap pa.

Inaasahan ng mga bisita na mabilis kang sasagot, lalo na sa araw ng pag‑check in o kung magkaroon ng isyu. Para sa mga hindi kagyat na tanong sa panahon ng pamamalagi, makatwiran ang pagtugon sa loob ng 12 oras. Para sa mga kagyat na usapin, halimbawa, walang susi na kailangan para makapasok, dapat kang tumugon sa loob ng isang oras.

• I‑set up ang mga notipikasyon. Gamitin ang Airbnb app para malaman kaagad kapag may mensahe ang mga bisita. Piliing makatanggap ng mga push notification sa app at sa mga setting ng device mo, siguraduhing malapit sa iyo at tutunog ang device mo, at magkusang alamin kung may natanggap kang mga mensahe sa panahon ng pamamalagi.

• Maghanda ng backup na plano. Magtakda ng tutulong kapag hindi ka available. Kumuha ng co‑host o iba pang taong magbibigay ng suporta at ibahagi sa mga bisita ang impormasyon sa pakikipag‑ugnayan niya.

• Gumamit ng mga mabilisang tugon. Sa pamamagitan nito, makakapaghanda ka ng mga sagot sa mga posibleng tanong para mas mabilis kang makatugon sa mga partikular na tanong. Halimbawa, puwede kang mag‑set up ng mabilisang tugon na nagsasaad sa mga paborito mong restawran sa malapit na ipapadala sa mga bisita kapag humingi sila ng mga rekomendasyon sa lugar.

Sikaping isaalang‑alang ang bawat sitwasyon sa pananaw ng bisita, lalo na kapag may planong naunsyami.

• Manatiling kalmado. Mahirap para sa lahat ang mga hindi inaasahang problema. Huminga nang malalim nang ilang beses at tumuon sa paglutas sa kinakaharap na problema.
• Maging tapat. Ipaalam sa mga bisita na natanggap mo ang kahilingan nila at inaasikaso mo na iyon. Ipaliwanag kung kailan mo inaasahang makakagawa ka ng paraan at kung paano mo sila babalitaan.
• Tumugon nang may malasakit. Isipin mong ikaw ang nasa sitwasyon ng mga bisita. Parang malaking problema kahit ang maliliit na isyu lang kapag wala sila sa sarili nilang tahanan.

Posibleng nagbago ang impormasyong nakasaad sa artikulong ito mula noong na‑publish ito.