Higit pang kontrol sa tab na Mga Listing

Napansin naming posibleng makatanggap ang mga mas detalyadong listing ng hanggang 20% mas maraming booking. Mula noong inilunsad ang tab na Mga Listing noong 2023, patuloy namin itong pinapahusay batay sa feedback ng host. 

Kasama sa 2024 Release sa Mayo ang nangunguna mong kahilingan para sa photo tour: ang kakayahang ayusin ang pagkakasunod‑sunod ng mga litrato ng listing sa loob ng mga kuwarto. Malapit ka na ring makapag‑update ng nabuo nang photo tour sa tulong ng AI.

Narito ang limang paraan para mas madaling mapangasiwaan ang listing mo sa tab na Mga Listing, simula sa na‑upgrade na photo tour.

Tulungan ang mga bisita na maunawaan ang layout ng patuluyan mo sa pamamagitan ng paggawa ng photo tour. Puwede mong gamitin ang AI para awtomatikong isaayos ang mga litrato ng listing mo ayon sa mga kuwarto at bahagi ng tuluyan, saka mano‑manong i‑edit ang tour.

Puwede mo nang i‑drag at i‑drop ang mga litrato para baguhin ang pagkakasunod‑sunod ng mga ito sa anumang kuwarto. Malapit mo nang magawang i‑update nang agaran ang tour kapag nagdagdag ka ng tatlo o higit pang litrato. Aayusin ng AI ang mga bagong larawan nang hindi binabago ang alinman sa mga pag‑edit na ginawa mo.

Karaniwang fini‑filter ng mga bisita ang mga resulta ng paghahanap sa Airbnb para makahanap ng mga tuluyan na may mga partikular na feature o amenidad. Puwedeng mamukod‑tangi ang listing mo kapag inilagay mo ang lahat ng iniaalok sa patuluyan mo. Pinapadali ng tab na Mga Listing ang pagdaragdag ng mga amenidad at pagpapanatiling updated ng mga ito.

Makakapili ka sa halos 150 amenidad ayon sa alpabeto o kategorya. Puwede ka ring maghanap ng amenidad ayon sa pangalan para hindi ka na mag‑scroll. Isama ang mga detalye kung hihingin, tulad ng paghahayag na may printer at ergonomic na upuan sa nakatalaga mong workspace.

Inaasahan ng mga bisita na tutugma ang mga tuluyan na na-book nila sa paglalarawan ng listing. Maitatakda ang mga dapat asahan kapag nagbigay ka ng malinaw at tumpak na impormasyon tungkol sa patuluyan mo at sa paligid nito.

Ilarawan ang lokasyon, dekorasyon, at hospitalidad mo. Sikaping ipaalam sa mga bisita kung ano mismo ang maaasahan nila sa pamamalagi sa patuluyan mo. Kasama rito ang mga maaari nilang makita, marinig, at maranasan

Kailangang madaling mahanap ng mga bisita ang patuluyan mo at madali silang makapasok dito. Sa tab na Mga Listing, puwede kang magdagdag o mag‑update ng impormasyon sa pagdating sa iisang lugar.

Mapapangasiwaan mo ang paraan at oras ng pag‑check in, mga tip sa direksyon at paradahan, password ng wifi, manwal ng tuluyan, mga tagubilin sa pag‑check out, at marami pang iba. Pagkatapos, maaari mong i‑preview ang magiging hitsura nito sa mga bisita. Matatanggap ng mga bisita ang impormasyong ito pagkatapos mag‑book, bago ang pag‑check in, at bago ang pag‑check out.

Tumutukoy ang smart lock sa elektronikong lock na gumagamit ng wifi at mabubuksan ng mga bisita gamit ang code sa halip na susi. Simple at mainam na paraan ito ng sariling pag‑check in.

Isang tool para sa pagho‑host ang pag-uugnay ng smart lock na nagbibigay‑daan sa iyo na magkonekta ng mga compatible na lock sa Airbnb at awtomatikong gumawa ng natatanging door code para sa bawat bagong booking.Kasalukuyang available ito sa mga host sa U.S. at Canada na may anim na listing o mas kaunti pa at may mga partikular na lock mula sa Schlage. Sasaklawin na rin ang mga device ng August at Yale ngayong taon.

Bahagi ng 2024 Release sa Mayo ang mga upgrade sa tab na Mga Listing.

Posibleng nagbago ang impormasyong nakasaad sa artikulong ito mula noong na‑publish ito.