Malinaw at simpleng pag‑check out

Madali lang dapat para sa mga host at bisita ang proseso ng pag‑check out. Idagdag mo sa iyong listing ang mga tagubilin at awtomatikong ipapadala ang mga iyon ng Airbnb sa mga bisita pagsapit ng gabi bago ang nakatakdang pag‑check out.

Magdaragdag ka ng mga tagubilin sa pag‑check out gaya kung paano ka naglalagay ng mga karaniwang alituntunin sa tuluyan. Para mabilisang gumawa ng listahan sa pag‑check out, pumili sa mga karaniwang gawain na ito:

• Tipunin ang mga ginamit na tuwalya
• Itapon ang basura
• I‑off ang mga dapat i‑off
• I‑lock ang mga dapat i‑lock
• Isauli ang mga susi

Puwede kang maglagay ng mga detalye tungkol sa bawat gawain. Halimbawa, puwede mong isaad na dapat ilagay ng mga bisita ang basura sa basurahan at ang mga puwedeng i‑recycle sa hiwalay na lagayan. Puwede ka ring maglagay ng mga kahilingang partikular sa patuluyan mo, gaya ng pagtatakip sa ihawan pagkatapos gamitin.

Mababasa ng mga bisita ang mga tagubilin sa pag‑check out at mga alituntunin sa tuluyan bago sila mag‑book ng matutuluyan. Kapag nag‑book na sila, mahahanap nila ang mga tagubilin sa pag‑check out sa tab na Mga Biyahe kasama ng mga alituntunin sa tuluyan, impormasyon ng wifi, at iba pang mahalagang detalye.

Umaasa ang mga bisita na madali silang makakapag‑check out at wala silang gagawing paglilinis pero hindi nila dapat iwan ang patuluyan mo sa kondisyong kailangan ng labis o masusing paglilinis alinsunod sa mga pangunahing alituntunin para sa mga bisita.

“Sinisiguro naming simple hangga't maaari ang proseso ng pag‑check out,” sabi ni Keshav na miyembro ng Host Advisory Board sa New Delhi. “Darating ang tagalinis at gagawin niya ang lahat ng kailangang gawin.”

Magpapadala kami sa mga bisita ng awtomatikong paalalang nagsasaad sa nakatakdang oras ng pag‑check out at mga tagubilin sa pag‑check out. Ipapadala iyon bilang push notification sa mobile device ng bisita pagsapit ng 5:00 PM sa araw bago ang nakatakdang pag‑check out, ayon sa time zone kung saan siya namamalagi.

Para matanggap ng mga bisita ang paalalang iyon, kailangan nilang i‑download ang Airbnb app at i‑on ang mga push notification. Kapag nag‑check out ang mga bisita, maipapaalam nila sa iyo na nakaalis na sila sa isang tap o click lang.

Mainam na bigyang‑diin kung bakit kinakailangang mag‑check out sa oras. “Sinasabi ko sa mga bisita na darating ang tagalinis nang 11:00 AM para ihanda ang apartment para sa mga susunod na bisita nang sa gayon ay maintindihan nila kung bakit mahalagang umalis sa oras,” sabi ni Joh na Superhost sa San Francisco.

Sa pamamagitan ng card sa pag‑check out, madali kang makakapagpadala sa mga bisita ng impormasyon sa pag‑check out. Kapag naglagay ka ng mga tagubilin sa pag‑check out, puwede kang magdagdag ng card sa pag‑check out sa mabilisang tugon o nakaiskedyul na mensahe. Naka‑link ang card sa mga tagubiling itinakda mo.

Awtomatiko mang magpapadala ang Airbnb ng paalala sa mga bisita sa gabi bago ang nakatakdang pag‑check out, ikaw pa rin ang bahalang magpasya sa magiging proseso ng pakikipag‑ugnayan mo sa mga bisita. Mainam na mag‑set up ka ng nakaiskedyul na mensahe para direktang magpadala ng paalala sa pag‑check out sa inbox sa Airbnb ng iyong mga bisita sakaling hindi nila na‑download ang app o hindi naka‑on ang mga push notification nila.

Kapag nakaalis na ang mga bisita, puwede nilang bigyan ng star rating ang pakikipag‑ugnayan ng host at tukuyin kung ano ang maganda o puwede pang mapabuti. Isang opsyon ang mag‑ulat ng “sobra‑sobrang gawain sa pag‑check out.” Maaaring alisin sa Airbnb ang mga listing na paulit‑ulit na makakatanggap ng mababang rating dahil sa mga hindi makatwirang gawain.

Pipili rin ang mga bisita ng kabuuang star rating para sa pamamalagi nila. Hindi makakaapekto sa pagiging Superhost ang feedback at star rating para sa mga partikular na kategorya, gaya ng pakikipag‑ugnayan.

Posibleng nagbago ang impormasyong nakasaad sa artikulong ito mula noong na‑publish ito.