Sinusuportahan ng Airbnb at mga lokal na host ang pagpapanatili sa kapaligiran sa Kenya

Kung may mapansin kang grupo ng mga Airbnb host na naglalakad sa baybayin ng Kenya, hindi sila namamasyal lang. Namumulot sila ng mga plastik na bote at iba pang basura bago iyon mapunta sa Indian Ocean.

Plano ni Pamellah na host at Lider ng Komunidad ng Host Club sa Coastal Region ng Kenya na sumali sa mga paglilinis ng beach na pinapangasiwaan ng lokal na nonprofit na A Rocha Kenya para mapanatili ang rehiyong kinalakhan niya. “Tinitipon namin ang komunidad ng mga host para makapagdulot ng malaking pagbabago sa lipunan namin,” sabi niya. “May tiwala kami sa isa't isa kaya walang kumikilos nang sarilinan.”

Nagsisikap ang A Rocha Kenya para pag‑aralan at ipanumbalik ang mga lugar na tinitirhan ng mga nanganganib na hayop at halaman para protektahan ang mga ito. Ninomina ni Pamellah na mabigyan ng donasyon ang organisasyon mula sa Pondo ng Airbnb para sa Komunidad dahil nahikayat siya ng pagtutuon nito sa pagpapanatili sa kapaligiran. Bawat taon, may pagkakataon ang mga miyembro ng Host Club na suportahan ang lokal na komunidad nila sa pamamagitan ng Pondo para sa Komunidad. 

Bahagi ang nonprofit ng mas malawak na network ng pagpapanatili sa kapaligiran ng A Rocha na sumasaklaw sa mahigit 20 bansa. Nakatuon ang A Rocha Kenya sa pagpapanatili sa kapaligiran na nag‑uugat sa komunidad. Kabilang sa mga aktibidad nila ang paglalagay ng tag sa mga ibon, pagtatanim ng mga bakawan, at pamimigay ng mga libreng punla ng puno. Nakikipagtulungan ito sa mga katutubong komunidad, lokal na magsasaka, samahan ng kababaihan, siyentipiko, at iba pa para magsaliksik at maghatid ng edukasyon tungkol sa kapaligiran.

Airbnb Host din si Colin, ang tagapagtatag ng A Rocha Kenya. Dati na siyang nakipagtulungan kay Pamellah para turuan ang kanilang komunidad tungkol sa pagpapanatili sa kapaligiran. “Naniniwala kaming bahagi ng solusyon ang mga tao kahit pa bahagi rin sila ng problema,” ayon kay Colin. “Naniniwala kaming mahalagang makisangkot at makilahok ang mga tao mula sa iba't ibang pinagmulan para magtagumpay rito.”

Sa loob ng ilang taon, marami nang napatuloy na mananaliksik at bisita sa Airbnb si Colin sa ecolodge niya sa bayan ng Watamu. Nasa lupain ng conservation center ng A Rocha Kenya ang tuluyan niya. Ayon sa kanya, nakakaambag sa mga inisyatiba ng nonprofit ang kinikita niya sa pagho‑host. Madalas na nagiging tagasuporta ang mga bisita ni Colin pagkatapos mabigyan ng pagkakataong makilahok sa mga aktibidad sa pagpapanatili sa kapaligiran.

Dahil sa nominasyon ng Host Club sa Kenya, nakatanggap ang A Rocha Kenya ng donasyong USD50,000 mula sa Pondo ng Airbnb para sa Komunidad. Gamit ang pondo, plano ng nonprofit na bumuo ng bagong nature reserve at magdagdag ng isa pang daanan sa canopy para mas mapaganda ang kasalukuyang nature reserve. 

Makakatulong din ang donasyon sa nonprofit na maipagpatuloy ang mga programa nito para sa ecotourism sa pamamagitan ng ecolodge, at makapag‑alok ng higit pang programang pang‑edukasyon, gaya ng pagbibigay ng mga seedling ng puno sa komunidad. 

Nagbigay ng nominasyon ang mahigit 50 Host Club para sa mga nonprofit sa iba't ibang panig ng mundo upang makatanggap ang mga ito ng mga donasyon mula sa Pondo ng Airbnb para sa Komunidad sa taong 2023. Bukas na ang nominasyon para sa mga donasyon mula sa Pondo para sa Komunidad sa taong 2024. Makipag‑ugnayan sa lokal na Host Club para matuto pa tungkol dito.

Posibleng nagbago ang impormasyong nakasaad sa artikulong ito mula noong na‑publish ito.