Paggamit sa mga review para mapahusay ang iyong gawain sa pagho-host

Ipinapaalam sa iyo ng magagandang review kung ano ang nagugustuhan ng mga bisita sa iyong patuluyan. At mabigat man sa loob na makatanggap ng negatibong review, makakatulong iyon sa iyo na humusay pa bilang host. Mula sa pinakaunang review sa iyo, magagamit mo ang feedback para mapahusay ang paraan ng pagho-host mo.

“Napakahalaga ng feedback,” sabi ni Juliette na miyembro ng Host Advisory Board sa Nairobi, Kenya. “Negosyo ito na kailangang tutukan, at maraming puwedeng mangyari na hindi inaasahan. Kaya naman mahalagang subaybayan mo ang iyong listing kung kaya mo dahil may malalaman ka sa mga review.”

Napapaigting ng mga review ang tiwala sa komunidad at nakakatulong ang mga ito sa pag-unlad ng iyong negosyo. Para makapulot ng aral sa mga review:

• Basahin ang bawat review pati na ang anumang pribadong feedback mula sa mga bisita.

• Gamitin ang mga positibong review para pagandahin pa ang iyong listing. Halimbawa, kung purihin ng bisita ang kusina mong may kumpletong kagamitan, maglagay ng litrato noon. Puwede mo pang i-quote ang review sa caption.

• Gamitin ang mga negatibong review o anumang pribadong feedback o mensahe bilang inspirasyon para pagandahin ang iyong mga amenidad o i-update ang paglalarawan ng listing mo. Mainam ding gumawa ng pampublikong tugon para iparating na tumatanggap ka ng feedback.

Ugali ng mga matagumpay na host na iwasan ang labis na pagpapaganda sa mga detalye ng listing at higitan ang inaasahan sa ipinapamalas nilang hospitalidad. “Palagi kong sinusubukang mas igihan ang gawa kaysa sa salita para palampasin ng mga bisita ang maliliit na isyu,” sabi ni Max na Superhost sa Bongaree, Australia.

Narito ang isang halimbawa ng paggamit ng feedback sa ganitong paraan:

• Kung may bisitang magbanggit sa kanyang review na may kaunting ingay sa kalye ng iyong tuluyan, ilagay sa paglalarawan ng listing mo na posibleng may ingay sa kalye ng tuluyan (para mapababa ang inaasahan).
• Kapag nag-check in sila, mag-alok ka ng earplugs o white noise machine (para mahigitan ang inaasahan).

Kung ipagtatapat mo sa simula pa lang ang mga potensyal na isyu, mas malaki ang pagkakataon mong makahikayat ng mga bisitang angkop sa patuluyan mo at maiwasang makatanggap ng negatibong review.

“Nakakatanggap kami ng mga mensahe mula sa mga bisita na nagsasabing masaya sila sa naging pamamalagi nila pero ganito namin iyon puwedeng mas mapaganda pa o gawing mas komportable pa,” sabi ni Keshav na miyembro ng Host Advisory Board sa New Delhi, India. “Talagang sinunod namin ang feedback na iyon. Pinakamarami akong natututunan kapag nakikipag-usap ako mismo sa mga bisita.”

Patuloy na makipag-ugnayan sa mga bisita pagkatapos nilang mag-check in para maiparating sa kanila na malalapitan ka nila kung may mga tanong o problema sila. Narito ang ilang tip:

• Gumamit ng mga nakaiskedyul na mensahe para makipag-ugnayan sa mga bisita sa mahahalagang sandali, gaya sa pagbu-book, pag-check in, at pag-check out.

• Pagkalipas ng unang gabi, kumustahin ang pamamalagi ng mga bisita at alamin kung may magagawa ka para makatulong. Para sa mas matatagal na pamamalagi, kumustahin sila kada linggo o nang regular.

• Kung sabihin ng mga bisita na may problema, tugunan iyon kaagad. Mauunawaan ng karamihan ng mga bisita kung magkaproblema hangga't mabilis mo iyong aayusin.

“Palagi akong naglalaan ng oras para tumugon sa bawat review, maganda man iyon o hindi,” sabi ni Omar na Superhost sa Mexico City. “Mababasa ang mga iyon ng mga potensyal na bisita.”

Dagdag pa ni Omar, inayos niya ang problema sa temperature ng tubig nang banggitin iyon ng bisita. Makalipas ang walong buwan, bumalik ang bisitang iyon para muling mamalagi sa patuluyan niya. “Dapat palaging isaalang-alang ang mga nakakatulong na review,” sabi niya.

Kung babasahin mo nang mabuti ang mga review, puwede kang humusay bilang host. “Maaari kang makatanggap ng negatibong review pero hindi iyon dagok,” sabi ni Alessandro na host sa Lombardy, Italy. “Pag-aralan ang dahilan ng negatibong review na iyon at ayusin mo ang mga dapat ayusin kung kinakailangan.”

Posibleng nagbago ang impormasyong nakasaad sa artikulong ito mula noong na-publish ito.