Paggawa ng plano para sa negosyo sa pagho-host

Si Nick at Sarah Roussos-Karakaian ay mag-asawang Superhost duo (@nestrs) na ginawang full-time na negosyo ang pagho-host sa Columbus, Ohio. Nagpatuloy sila sa pagho-host matapos i-list ang kanilang basement sa New York City sa Airbnb noong 2012. Mula noon, ginawa nila ang lahat para iayon ang trabahong ito sa estilo ng pamumuhay na gusto nila. Co-host din si Sarah sa podcast na "Salamat sa Pagbisita," isang sanggunian para sa mga bihasa at bagong host. Dito, ibinabahagi nila ang kanilang kaalaman at mga tip sa kung paano simulan ang isang negosyo sa Airbnb.

Sarah: "Para sa amin, nagsimula ito sa Queens, New York. Dati akong aktor. Madalas din akong nagtatrabaho dati bilang bartender."

Nick: "At naging intern ako na may master's degree sa arkitektura na halos hindi mapakain ang sarili..."

Sarah: "At pareho talaga naming gustong-gustong magkaroon ng property pero hindi namin alam kung paano. Isang araw, may nakita akong munting bahay—iyon ang pinakamaliit sa bloke pero mahal pa rin iyon para sa amin—pero determinado akong maghanap ng paraan para mabili iyon."

Nick: "Sa tulong ng tamang tagubilin sa pananalapi, pagtitipid, at suporta mula sa pamilya, nakakuha kami ng loan."

Sarah: "At habang nangyayari ang lahat ng ito, nalaman ko na nagli-list ang aking kaibigan ng kuwarto sa kanyang apartment sa Airbnb, na tumutulong sa kanya na mabayaran ang kanyang upa sa Lungsod ng New York. Sobrang nakakagulat iyon para sa akin. Hindi pa masyadong kilala ang Airbnb noon. Sinabi ko kay Nick na puwede siguro naming i-list ang aming property doon. Nag-alangan siya pero naintriga ako. Sumali kami sa Airbnb at doon na nagsimula ang lahat."

Nick: "Naaalala ko noong naglalampaso at naglilinis ako ng mga banyo dati. Masaya kong ginawa iyon. Nakatulong iyon para mabayaran namin ang aming mortgage kaya naisip ko: 'Uy! Ayos ito! Paano kaya kami makakahanap ng mas marami pa ng ganitong pagkakakitaan?’"

Sarah: "Nagawa kong i-apply ang aking karanasan sa hospitalidad na natutunan ko sa pagtatrabaho sa mga mamahaling hotel—at sobrang ikinatuwa ko iyon. Matapos ang apat na taon ng pagho-host at pagiging may-ari ng tuluyan sa NYC, pinalad kaming makakuha ng katok sa pinto mula sa isang developer na gustong bilhin ang aming lugar, pati na ang mga kagamitan doon."

Nick: "Pagkatapos ng kaunting soul searching, isang mahabang spreadsheet ng mga lugar na maaari naming sunod na puntahan, at mga road trip sa buong bansa at pakikipag-usap sa mga lokal, nakarating kami sa Columbus, Ohio."

Sarah: "Natupad ang aking pangarap na pagsama-samahin ang disenyo, hospitalidad, at real estate—at na magkaroon ng kalayaan na maging malikhain at sundin ang aming sariling desisyon. Ito ang dahilan kung bakit gustong-gusto naming tulungan ang iba na matuto kung paano mag-host."

Sarah: "Bago ka magsimula, inirerekomenda namin ang paggawa ng mission statement para sa iyong sarili. Ito ang iyong saloobin at ang gagabay sa iyo. Makakatulong ito sa mga sandaling maaaring hindi ka sigurado tungkol sa direksyon ng iyong negosyo o isang desisyon. Gagabayan ka ng iyong mission statement upang magtagumpay. Ito rin ang magiging gabay mo sa paggawa at pagdisenyo ng iyong patuluyan."

Nick: "Kapag gumagawa ng mission statement, maglaan ng oras para tanungin ang iyong sarili ng ilang katanungan:

• Ano ang dahilan kung bakit mo ito ginagawa?
• Ano ang mga bagay na pinapahalagahan mo?
• Paano mo gustong patakbuhin ang iyong negosyo?
• Ano ang hangarin mo?
• Ano ang mga layunin mo?"

Sarah: "Para sa amin, layunin naming makapagpaganda ng mga tuluyan na makakapagpabago ng buhay ng iba. At sinusubukan naming alalahanin iyon sa lahat ng pagkakataon."

Nick: "Bago ka magsimula, mahalagang magsaliksik at kilalanin ang mga kakumpitensya sa iyong lugar. Malalaman mo kung paano idisenyo, bigyan ng brand name, at i-market ang iyong patuluyan mula sa paunang pananaliksik na ito.

• Isaalang-alang ang demograpiya. Sino ang malamang na mag-book ng pamamalagi sa iyo? Halimbawa, para sa amin, maraming mag-aaral sa kolehiyo sa Columbus kaya't inilalaan namin ang aming mga patuluyan para sa mga dumadalaw na magulang.
• Suriin ang iyong mga amenidad. Pinapahintulutan mo ba ang mga alagang hayop? Mayroon ka bang paradahan o pool? Kakaiba ba ang dekorasyon sa iyong patuluyan? Maaaring maningil ng higit pa kapag may mga bagay na mas nagpapaganda ng iyong patuluyan.
• Maghanap online at tingnan ang iba pang listing sa Airbnb, hotel, at panandaliang matutuluyan sa malapit. Ano ang available? Magkano ang sinisingil nila? Mayroon bang paraan upang mamukod-tangi ka?
• Gumawa ng diskarte sa pagpepresyo. Upang matulungan kang mapataas ang rate sa tagal ng pagpapatuloy kapag kakasimula mo lang, gamitin ang tool na Smart Pricing ng Airbnb. Awtomatiko nitong binabago ang mga presyo para sa karaniwang araw at katapusan ng linggo."

Sarah: "Napakahalaga ng pagbabadyet, kahit na maaaring medyo boring ito. Inirerekomenda namin ang paggamit ng isang spreadsheet at pagkakategorya ng iyong mga gastos sa tatlong parte:

Mga paunang gastusin: Ito ang mga paunang pamumuhunan na ilalaan mo para sa iyong patuluyan bago ka tumanggap ng mga bisita, tulad ng pagkukumpuni, dekorasyon, muwebles, at photography.

• Mamuhunan sa dekorasyon. Hindi mo kailangang bumili mula sa mga pinakamamahaling retailer o magkaroon ng mga pinakamagagarbong bagay. Gawin lamang itong maaliwalas. Magtingin-tingin sa tindahan ng mga segunda mano o maging malikhain at sumubok ng kakaiba gamit ang isang kulay o tema—mapapansin ng mga tao ang iyong listing dahil sa mga ito.
• Palagi naming sinasabi sa mga bagong host na mamuhunan sa mga komportableng kutson, sopa, at sapin. Laging kama ang unang sinusubukan ng lahat pagpasok ng kuwarto sa hotel—kaya siguraduhin na maganda at maayos ang kama. Nakakakuha kami minsan ng 5-star na review dahil lamang sa kama, na nakakatulong para mapataas ang rate sa tagal ng pagpapatuloy.

Mga paulit-ulit na gastusin: Kailangang muling palitan ang mga pangunahing item na ginamit ng bisita, tulad ng mga gamit sa banyo, toilet paper, mga paper towel, mga baterya, at mga bombilya.

• Magbibigay ka ba ng mga extra tulad ng mga bote ng tubig o kape?
• Gumawa ng listahan ng lahat ng amenidad na kailangan mo, at tiyakin na nasisiyahan ka sa mga presyo na iyong nahahanap
• Laging bumili nang maramihan na sakto para sa anim na buwan, at subaybayan ang bilang gamit ang isang spreadsheet
• Sa mga item tulad ng mga sapin, isaalang-alang kung gaano karaming beses mo gugustuhing bilhin ang mga ito sa buong taon. Gusto mong tiyakin na lagi kang mayroong magaganda at malilinis na sapin para sa iyong bisita.

Mga gastusin sa pagmementena at pangangasiwa: Saklaw nito ang lahat ng kinakailangan upang mapanatiling ligtas, kaaya-aya, at matitirahan ang iyong patuluyan, kabilang ang hardin at mga lugar na nasa labas. Kukuha ka ba ng tagalinis upang matulungan ka sa paghahanda ng tuluyan o ng isang co-host?

Kalkulahin ang kabuuan ng mga numerong ito at tiyaking komportable ka sa iyong pamumuhunan at mga makatotohanang layunin. Kung hindi, marahil ay kailangan mong mag-ipon pa ng kaunti upang magkaroon ka ng tuluyan na maipagmamalaki mo."

Sarah: "Ito ang isa sa aking mga paboritong tip na ibahagi sa mga host, at ito ay ang panghihikayat sa isang matapat at prangka na kaibigan na mamalagi sa iyong patuluyan. Lagi kang naroon araw-araw kaya maaaring makalimutan mo ang mga bagay na maaaring kailanganin ng isang biyahero—tulad ng sipilyo o toothpaste—o isang depekto sa disenyo na hindi mo napansin. Puwedeng makatulong ang isang kaibigan na magbigay ng feedback tungkol sa mga nakakayamot ngunit mahahalagang detalye. Hindi mo gugustuhing mapuna ito ng mismong nagbabayad na bisita."

Nick: "Nagdadagdag kami ng 'May nakalimutan?' basket ng mga gamit sa banyo at mga item na maaaring biglaang kailanganin ng mga bisita. Upang magtagumpay, ang pagbibigay ng bukod-tanging hospitalidad dapat ang pundasyon ng iyong negosyo. Ito ang dahilan kung bakit pumupunta ang mga tao sa iba-ibang may tatak na hotel na gusto nila—dahil alam nila kung ano ang aasahan: isang lugar kung saan pakiramdam nila ay sila ang pinaka-unang nakarating doon, mga tuwalya na maingat na itiniklop, at alam nilang maaasahan nila ang lahat ng detalye tulad ng pagkakaroon ng charger ng telepono malapit sa mesa sa tabi ng kama. Iyon din ang dapat mong gawin—ang magbigay ng parehong antas ng serbisyo sa iyong mga bisita para gustuhin nilang bumalik nang paulit-ulit."

Nick: "Hindi madali ang pagho-host, pero iba na rin ang laro ngayon kaysa noong una kaming nag-umpisa sa Airbnb. Mas maraming teknolohiya, tool, sanggunian, at suporta para matulungan ka sa proseso at gawing mas madali ang lahat para sa host."

Sarah: "Kapag nagsisimula pa lang ang mga host, inirerekomenda namin ang paggawa ng end-to-end na proseso sa bawat pamamalagi: mula sa unang mensahe sa pag-book, pagbati sa iyong mga bisita, paglilinis, hanggang sa paghahanda ng tuluyan. Kapag naintindihan mo na ang mga bagay-bagay, puwede mo na itong i-automate sa maraming iba't ibang paraan, halimbawa:

• Mga web-based app: Mayroong mga app na magagamit mo (tulad ng IFTTT) para mai-program ang mga event trigger at kumonekta sa mga digital tool. Halimbawa, kapag nakatanggap ka ng kumpirmasyon ng booking sa iyong email inbox, makakapagpadala ito ng awtomatikong paalala sa kalendaryo sa iyo, sa iyong partner, o sa tagalinis.
• Isang nakakapagpabagong imbensyon ang mga smart lock. Puwedeng mapadalhan ang mga bisita ng isang natatanging code na may bisa lang sa panahon ng kanilang biyahe. Pinapahintulutan ng mga ito ang mga bisita na mag-check in nang mag-isa, na nangangahulugang hindi kailangang makipagkasundo tungkol sa oras para mapapasok sila sa apartment. Maaaring makipag-ugnayan na lang sa kanila sa gitna ng kanilang pamamalagi.
• Ang naka-print na checklist: Gumawa ako ng pang-tatluhang buwan na checklist para sa bawat tuluyan. Nakasaad doon ang mga bagay na kailangan kong gawin para sa kaligtasan at pagmementena, tulad ng pagsuri sa mga filter ng pugon, pagberipika na gumagana ang mga baterya sa mga fire alarm, pagwawalis sa ilalim ng mga kama. Pini-print ko ang listahan at inilalagay ko ito sa gilid ng aparador—kaya kapag bibisita ako sa isang property, malalaman ko ang katayuan nito para sa buong taon."

Nick: "Kailangan mong magsikap kung gusto mong magsimula ng negosyo sa Airbnb. Pero umaasa talaga kaming maipakita sa mga tao na posibleng magkaroon ng sariling bahay at gawin itong full-time na trabaho—at maraming paraan upang magawa ito."

Sarah: "Nagbago ako ng karera. Sobrang gustong-gusto ko ang pagtatanghal, at takot na takot ako noon na hindi makahanap ng bagay na gugustuhin ko tulad ng pagtatanghal. Pero binago ng Airbnb ang aming buhay. May kalayaan kaming maging malikhain, sundin ang aming sariling desisyon, at maging sarili naming boss— mas espesyal kapag ganoon."

Nick: "Nagbibigay-daan ito sa amin na manatiling pleksible at mas mag-enjoy sa buhay. Makahanap ka sana ng paraan para masimulan ang isang negosyo sa Airbnb at gawin itong iyo. Kung kailangan mo pa ng payo, puwede kang makipag-ugnayan sa amin."

Maligayang pagho-host!
Nick + Sarah, Nestrs