Para magbigay ng suporta para sa mga pang‑emergency na matutuluyan sa panahon ng krisis

Kilalanin ang Airbnb.org at mag‑host o magbigay ng donasyon para makibahagi.
Ni Airbnb noong Hul 6, 2023
4 na minutong pagbabasa
Na-update noong Hul 6, 2023

Kapag napipilitang lumikas ang mga tao dahil sa mga kalamidad o malawakang kaguluhan, isa sa mga pangangailangan nilang dapat matugunan kaagad ang paghanap ng lugar na matutuluyan. Kapag may panandalian silang matutuluyan, makakatuon sila sa iba pang priyoridad at makakagawa sila ng mga pangmatagalang plano. Puwede kang makagawa ng pagbabago kapag nag‑host ka ng mga pang‑emergency na pamamalagi o nagbigay ka ng donasyon sa Airbnb.org.

Ano ang Airbnb.org?

Ang Airbnb.org ay isang 501(c)(3) na nonprofit sa US na pinapatakbo nang hiwalay sa Airbnb. Nagsimula ang pagsisikap noong 2012 nang ialok ni Shell na host sa Brooklyn, New York ang patuluyan niya nang libre sa mga taong lumikas dahil sa Bagyong Sandy. Humingi ng tulong ang Airbnb sa iba pang bahagi ng komunidad, at mahigit 1,000 lokal na host ang nagpatuloy ng mga taong naapektuhan ng bagyo.

Naging inspirasyon ng Airbnb ang ginawa ni Shell kaya bumuo ito ng programang magagamit ng mga host sa iba't ibang panig ng mundo para ialok ang mga patuluyan nila sa panahon ng krisis. Noong 2020, naging nonprofit na Airbnb.org ang programang ito, at nagkaroon ito ng sariling misyon at lupon ng mga direktor.

Nakikipagtulungan na ngayon ang Airbnb.org sa mga pamahalaan, NGO, at organisasyong pangkawanggawa sa iba't ibang panig ng mundo para mabigyan ang mga tao ng mga pansamantalang lugar na matutuluyan. Sa tulong ng mga nagbibigay ng donasyon at sa pamamagitan ng platform ng teknolohiya at pandaigdigang komunidad ng mga host ng Airbnb, rumeresponde ito sa mga kalamidad, kaguluhan, at iba pang kagipitan.

Simula 2012, nakapag‑ugnay na ang Airbnb at Airbnb.org ng halos 300,000 tao sa mga pang‑emergency na matutuluyan, kabilang ang mga refugee mula sa Ukraine at mga taong nawalan ng tirahan dahil sa mga lindol sa Türkiye at Syria. Sa nakalipas na tatlong taon, mahigit 91,000 host sa 189 na bansa ang nag‑sign up para magpatuloy ng mga bisita. Patuloy na dumarami ang nangangailangan ng suporta.

Paano magbigay ng donasyon sa Airbnb.org?

Puwede kang gumawa ng minsanang donasyon, may patuluyan ka mang puwedeng i‑host o wala. Kung regular kang nagho‑host sa Airbnb, puwede kang magbigay ng partikular na porsyento ng bawat payout. Alinman ang gawin mo, gagamitin ang 100% ng donasyon mo sa pagpopondo ng mga pang‑emergency na matutuluyan (at hindi sa mga gastusin sa pagpapatakbo ng Airbnb.org).

Paano maging host sa Airbnb.org?

Kung host ka sa Airbnb, puwede kang gumamit ng kasalukuyang listing mo o gumawa ng bago para sa ibang property. Mapipili mong ialok ang patuluyan mo nang libre o nang may diskuwento sa pamamagitan ng Airbnb.org.

Puwede ka ring mag‑sign up para mag‑host sa pamamagitan lang ng Airbnb.org. Ibig sabihin nito, magho‑host ka lang ng mga bisitang nangangailangan ng pang‑emergency na matutuluyan. Sa sitwasyong ito, puwede mo lang ialok ang patuluyan mo nang libre.

Mamamalagi ang mga bisita sa Airbnb.org nang wala silang babayaran. Pinopondohan ng mga donasyon ang mga booking. Sa pamamagitan ng pag‑aalok sa patuluyan mo nang libre o nang may diskuwento, makakatulong ka para mas marami ang makinabang sa mga donasyon at mabigyan ng mga pang‑emergency na matutuluyan ang mas marami pang tao.

Hindi sinisingil ng Airbnb ang lahat ng bayarin sa serbisyo nito para sa mga pamamalagi sa Airbnb.org. Protektado ng AirCover para sa mga Host ang mga reserbasyon.

Sino ang mga bisita sa Airbnb.org?

Kadalasang nire‑refer o sinusuportahan ang mga bisita sa Airbnb.org ng mga organisasyong nakatuon sa pagresponde sa krisis at pag‑aasikaso sa paninirahan ng mga refugee. Hindi direktang makakahiling ng pang‑emergency na pamamalagi sa pamamagitan ng Airbnb.org ang mga bisita.

Kabilang sa mga bisitang kwalipikadong paunlakan ng pang‑emergency na pamamalagi ang:

  • Mga taong apektado ng malulubhang sakuna, at mga relief worker na opisyal na rumeresponde sa mga naturang sakuna.

  • Mga refugee, o mga taong humihiling ng proteksyon sa ibang bansa, Special Immigrant Visa, o iba pang katayuan sa imigrasyon na may katulad na layuning pagkakawanggawa.

Para sa pang‑emergency na pamamalagi ng mga kwalipikadong bisita, maaari silang makatanggap ng credit sa Airbnb.org na magagamit para mag‑book noon, o puwedeng nonprofit partner ang mag‑book at makipag‑ugnayan sa host para sa kanila.

Sa pamamagitan ng pagpapatuloy mo sa mga taong nangangailangan ng tulong, maaari mong mapagaan ang nararamdaman nila. Lumikas mula sa Ukraine noong 2022 ang bisita sa Airbnb.org sa Berlin na si Dima. Sobrang emosyonal ako noong mga unang araw na iyon,” sabi ni Dima. “Ni hindi ko alam kung ano ang mas mahalaga para sa akin: ang makapunta sa ligtas na lugar o ang malaman lang na maraming sumusuporta sa akin.”

Malalaman ba ng mga bisita na tagasuporta ako ng Airbnb.org?

Oo. Kapag nag‑sign up ka para mag‑alok ng mga pang‑emergency na matutuluyan nang libre o nang may diskuwento, o nagtakda ka ng mga umuulit na donasyon mula sa mga payout mo, magkakaroon ka ng badge ng tagasuporta ng Airbnb.org sa profile mo bilang host.

Milyon‑milyong tao sa iba't ibang panig ng mundo ang nawawalan ng tirahan dahil sa kaguluhan at sakuna. Puwede kang makagawa ng makabuluhang pagbabago sa buhay ng mga refugee, taong lumikas, at relief worker sa pamamagitan ng pagpapatuloy ng mga bisita o pagbibigay ng donasyon para masuportahan ang mga pang‑emergency na matutuluyan.

Airbnb
Hul 6, 2023
Nakatulong ba ito?