Hindi available sa pinili mong wika ang nilalamang ito, kaya inihanda namin ito sa pinakamalapit na available na wika sa ngayon.

Mga tip sa paglilinis mula sa mga batikang host

Natutuwa ang mga bisita sa malinis na tuluyan at puwede silang magbigay ng magagandang review dahil doon.
Ni Airbnb noong Mar 9, 2023
4 na minutong pagbabasa
Na-update noong Mar 9, 2023

Maaaring makakuha ng magagandang review kapag malinis ang patuluyan. Gayunpaman, ayon sa datos ng Airbnb, isa sa mga pangunahing dahilan para makatanggap ng mga negatibong review ang kakulangan ng kalinisan. Subukan ang mga tip na ito mula sa matatagal nang host para masigurong malinis ang iyong patuluyan.

Pagbuo ng diskarte sa paglilinis

Ikaw man mismo ang naglilinis o kumukuha ka ng mga tagalinis, mahalagang masusing linisin ang iyong patuluyan sa tuwing matatapos at magsisimula ang pamamalagi ng bawat bisita.

“Mahalagang hindi pabago-bago ang mga gawain at may mga checklist para sa mga tagalinis,” sabi ni Juliette na miyembro ng Host Advisory Board sa Nairobi, Kenya. “Nakakatulong ito sa kanila dahil nagiging regular na itong gawain. Talagang epektibo ang wastong pangangalaga sa tuluyan.”

Kung kukuha ka ng tagalinis, pasadahan mo mismo ang proseso ng paglilinis para malaman mo mismo ang kailangang gawin at dapat isama sa mga checklist. Siguraduhin mong maglalaan ka ng sapat na panahon sa pagitan ng mga booking para matiyak na masusi ang paglilinis. Maghanap din ng ikalawang tagalinis o gumawa ng backup na plano sakaling hindi makarating ang tagalinis.

Kailangang higit na pagtuunan ang pinakamaliliit na detalye sa paglilinis para sa mga bisita kumpara sa posibleng ginagawa mo kapag naglilinis ka para sa iyong sarili. Pag-isipang magsagawa ng mga pana-panahong masusing paglilinis para mas mapadali at mas mapabilis ang mga regular na gawain sa pagitan ng mga booking.

Pagsisimula sa mga pangunahing bagay

Binibigyang-diin ni Juliette ang kahalagahan ng pagtuon sa ilang partikular na bahagi habang naglilinis.

  • Magsimula sa mga bahaging madalas daanan at puntahan. “Napakahalaga ng kusina at banyo dahil ang mga iyon ang pinakamadalas gamitin,” sabi ni Juliette. Kapag wala nang bahid ng dumi ang mga banyo, kusina naman ang pagtutuunan kung saan hinuhugasan ng mga tagalinis niya ang lahat ng pinagkainan at pinaglutuan. “Talagang masusing paglilinis ang ginagawa namin,” sabi niya.
  • Susunod: ang mga kuwarto. Binubuksan ng mga tagalinis ni Juliette ang mga drawer, sinisilip nila ang ilalim ng mga higaan, at tinitiyak nilang walang napapalampas. “Pagkatapos, inaalisan namin ng sapin ang mga higaan, pinapahanginan namin ang bahay, binubuksan namin nang husto ang mga bintana, binababad namin ang mga gamit sa higaan,” sabi niya.
  • Panghuli, nililinis ang mga higaan. Ano ba ang regular na ginagawa ni Juliette? “May mga takip ang mga kutson at unan at kailangang palitan ang buong set,” sabi niya.

Pagtutok sa pinakamaliliit na detalye

Mag-isip na parang bisita. Halimbawa, sabi ni Tammi na host sa Seattle: “Nakakalimutan kadalasan ang kurtina ng shower. May plastic liner ako na sine-spray at pinupunasan ko pagkatapos ng pamamalagi ng bawat bisita. Pinapalitan ko rin iyon kada isa o dalawang buwan.”

Gayundin, huwag palampasin ang mga bahaging madalas hawakan, gaya ng mga switch ng ilaw. “Maaaring dumumi nang husto ang mga iyon pero hindi mo napapansin dahil nakasanayan mo nang ganoon ang mga iyon,” sabi ni Adam na host sa Atlanta. “Punasan lang ang mga iyon ng kaunting alcohol at ayos na.”

Pag-iwas sa problemang dahil sa buhok

Walang bisitang may gustong makahanap ng buhok ng iba sa kanilang tuluyan. May tip sina Sue at John na mga host sa Salt Lake City kung paano alisin ang mga ligaw na hibla ng buhok: “Pagkatapos kong labhan ang lahat ng gamit sa higaan, ginagamitan ko ng lint roller ang mga sapin, punda, at kumot,” sabi nila.

Iminumungkahi ni Laura na host sa Cottonwood, Arizona na itabi ang mop. Sabi niya, “Lumuhod at linisin ang sahig ng banyo” gamit ang pangkuskos na brush o microfiber na pamunas. “Mas mabilis at mas madali iyon at wala ka pang mapapalampas na hibla ng buhok.” Tandaan ding linisin ang mga drain ng banyo pagkatapos ng pamamalagi ng bawat bisita.

Pagsubok sa mga tip ng ibang host

Narito ang ilang inspirasyon sa paglilinis mula sa mga batikang host:

  • Magsalang muna ng labada sa washing machine. “Inuuna kong kunin at isalang sa washing machine ang lahat ng sapin at tuwalya para malabhan ang mga iyon habang naglilinis ako,” sabi ni Emma-Kate na nasa San Francisco. “Maraming magagawa sa ganitong paraan.”
  • Pakintabin ang mga kahoy na sahig. “Gawa sa matigas na kahoy ang mga sahig sa patuluyan ko. Regular kong pinapakintab ang mga iyon kaya makikinang na sahig ang tumatambad sa mga bisita sa pagpasok nila,” sabi ni Tammi na nasa Seattle. “Naipaparating nito na malinis ang patuluyan na nakakapagpapanatag ng isip.”
  • Tupiin ang tisyu sa banyo. “Tinutupi ko ang dulo ng toilet paper,” sabi ni Emma-Kate. “Maliit na bagay ito pero naipaparamdam nito na malinis ang lahat at may malasakit ka.”
  • Punuin muli ang mga bote ng sabon sa kamay at shampoo. “Nakakatuwa kapag parang bago ang mga amenidad sa banyo,” sabi ni Alex na nasa San Francisco. “Kapag puno at sarado ang bote, nararamdaman ng mga bisita na parang siya ang unang gagamit noon.”
Posibleng nagbago ang impormasyong nakasaad sa artikulong ito mula noong na-publish ito.
Airbnb
Mar 9, 2023
Nakatulong ba ito?