Paano makikinabang ang iyong negosyo sa pagho-host ng mas matatagal na pamamalagi

Puwedeng maging mahusay na diskarte sa pagho‑host ang pagtanggap ng mas matatagal na pamamalagi. Puwede kang magkaroon ng mas maaasahang kita, maaaring mabawasan ang aasikasuhin mong pagpapalit ng bisita, at makakapag‑host ka nang may higit na flexibility.

Sa mas matatagal na pamamalagi, puwedeng mabilis na mapuno ang kalendaryo mo. Lingguhan (hindi iikli sa pitong gabi) o buwanan (hindi iikli sa 28 gabi) man ang mga ito, nababawasan ng mga ito ang mga bakanteng gabi sa pagitan ng mga reserbasyon.

Puwede ring makapagbigay ng mas maaasahan at tuloy‑tuloy na kita ang mas matatagal na pamamalagi. Kapag nag‑host ka ng bisita nang mahigit isang buwan, babayaran ka nang regular na hulugan.

Magdagdag ng mga lingguhan at buwanang diskuwento para mahikayat ang mga bisita na mag‑book ng mas matatagal na pamamalagi:

1. I‑tap o i‑click ang icon ng mga setting sa kalendaryo mo.

2. Mag‑scroll papunta sa Mga diskuwento sa tab na Presyo.

3. Piliin ang Lingguhan o Buwanan. May iminumungkahing diskuwento batay sa listing mo at sa demand para sa mga katulad na listing sa lugar.

4. Igalaw ang slider sa pagitan ng 0 at 99% para ayusin ang diskuwento at subaybayan kung paano nito binabago ang average na lingguhan o buwanang presyo ng listing mo.

5. Piliin ang presyong babayaran ng bisita na nasa ibaba para makakuha ng detalye ng presyo, kasama ang anumang bayarin at ang kikitain mo.

6. I‑tap o i‑click ang I‑save para itakda ang gusto mong diskuwento.

May mga host na mas gustong magpatuloy ng mga bisitang interesadong mamalagi nang mas matagal. Nagbabahagi sila ng mga link papunta sa listing nila sa mga lokal na kompanya o unibersidad na posibleng may mga empleyado o estudyanteng naghahanap ng pansamantalang matutuluyan.

“Interesado lang akong [mag‑host] ng mas matatagal na pamamalagi,” sabi ni Patricia na Superhost sa Austin, Texas. “Hangad kong makapagpatuloy ng mga bumibiyaheng propesyonal na mamamalagi nang dahil sa trabaho nang isa hanggang tatlong buwan.”

Kapag pangmatagalan ang mga booking, karaniwang mas madalang ang pagpapalit ng bisita at mas kaunti ang kailangang gawin, lalo na sa pagpapadala ng mensahe sa mga bisita at paglilinis ng patuluyan.

Halimbawa, karaniwang mas maikling panahon ang ginugugol ng mga host sa pakikipag‑ugnayan sa isang grupo ng mga bisitang mamamalagi nang isang buwan kumpara sa pakikipag‑ugnayan sa iba't ibang bisitang mamamalagi nang ilang gabi lang.

Para mapanatiling malinis ang patuluyan, may mga host na nagbibigay ng mga serbisyo at kagamitan sa paglilinis. “Nag‑aalok ako ng libreng lingguhang paglilinis na may kasamang pagpapalit ng mga linen at mga nagamit nang pangunahing kailangan para masiguro kong maayos ang lahat,” sabi ni Omar na Superhost sa Lungsod ng Mexico. Nagho‑host siya ng mga pamilya at mga nagtatrabaho nang malayuan na namamalagi nang hanggang anim na linggo sa bawat pagkakataon.

Puwedeng naaakma sa iyo ang mga reserbasyon para sa mas matatagal na pamamalagi kung matagal kang umaalis. Sabi ni Maggie na co‑host sa Northampton, Massachusetts, palaging walang tao dati sa bahay ng mga magulang niya sa tuwing pumupunta sila sa Puerto Rico kapag taglamig. “Wala kaming kinikita rito dati, pero nag‑Airbnb kami at kumikita na kami ng USD3,500 kada buwan,” sabi niya.

Puwede ring maging mainam ang mas matatagal na pamamalagi sa mga komunidad na naglilimita sa mga panandaliang pagpapatuloy. Tiyaking naaayon sa mga lokal na alituntunin at regulasyon ang itinakda mong minimum at maximum na tagal ng pamamalagi.

Kung nasa lugar ka kung saan pinapahintulutan ang maiikli at matatagal na pamamalagi, pag‑isipang pana‑panahong ayusin ang mga setting mo. Makakatulong ito sa iyong masulit ang demand ayon sa panahon sa lugar habang nahihikayat ang mga bisitang mag‑book ng anumang gabi o linggo na available sa pagitan ng mga reserbasyon para sa buwanang pamamalagi.

Posibleng nagbago ang impormasyong nakasaad sa artikulong ito mula noong na‑publish ito.