Bumubuo ng pagkakaibigan pagkatapos ng sunog

Matapos sumiklab ang Camp Fire sa California noong 2018, nagkakilala ang dalawang babae sa pamamagitan ng Open Homes.
Ni Airbnb noong May 7, 2019
6 na minutong pagbabasa
Na-update noong Ago 24, 2023

Mga Katangi-tanging Feature

  • Noong sumiklab ang Camp Fire sa California, nag-sign up ang mga tao sa mga kalapit na komunidad para magkaloob ng pansamantalang matutuluyan sa pamamagitan ng programang Open Homes ng Airbnb

  • Nakahanap ng matutuluyan si Melissa at ang pamilya niya sa tulong ni Cinde na isang negosyante sa Sacramento

  • Nag-ambag din ang mga kapitbahay ni Cinde sa pagtulong sa pamilya ni Melissa, at magkaibigan pa rin ang dalawang babae

Airbnb.org na ngayon ang Open Homes

Airbnb.org na ngayon ang programang Open Homes ng Airbnb. Isa itong bagong 501(c)(3) nonprofit. Nagpapasalamat kami sa pakikiisa mo sa amin para mabuo ang komunidad ng Open Homes. Nasasabik kaming makasama ka sa bagong kabanatang ito.

Noong umaga ng Nobyembre 8, 2018, mahigit walong buwan na ang dinadala ni Melissa Johnson, at natutulog pa siya habang naghahandang pumasok sa eskuwelahan ang mga anak niya. Naaalala niyang pinag-uusapan ng asawa at anak niyang babae ang langit na kulay orange at iniisip nilang baka may sunog sa karatig-bayan.

Makalipas ang kalahating oras, tumawag ang anak na babae ni Melissa. “Wala na raw pasok. Bumangon ako, at nagimbal ako nang makita ko ang langit,” sabi ni Melissa. “Pula at orange iyon at parang katapusan na ng mundo. Tapos puro abo ang paligid.”

Labing-apat na taon nang nakatira sa Paradise sa California si Melissa at ang asawa niyang si Trevor, pero lumipat sila sa bahay nila isang linggo bago sumiklab sa estado ang mapaminsalang Camp Fire. Noong umagang iyon, “may boses sa loob ko na nagsabi sa aking kailangan naming tawagin ang lahat at umalis para sa kaligtasan namin, para lang makasiguro.”

Bukod kina Melissa, Trevor, at dalawa nilang anak, kasama sa “lahat” ang tatay ni Trevor, dalawang Great Dane, isang toy poodle, isang pusa, at isang kuneho. Sumakay sila sa dalawang kotse, at nagmadali si Melissa na sunduin ang mga anak niya.

“Hindi magkandaugaga ang mga tao at nagkakagulo ang mga sasakyan. Ganoong eksena ang inaasahan mong mapanood sa pelikula. Hindi mo maiisip na mararanasan mo mismo iyon at makakasaksi ka ng talagang kakila-kilabot. May sunog sa kaliwa, kanan, harap, at likod mo. May mga sandaling parang nagmamaneho ako patungo sa sunog at hindi ko alam kung tama ang pinipili kong daanan. Iyak ako nang iyak noon.”

Nakarating din ang pamilya sa Chico sa California kung saan puwede silang makituloy sa kapatid ni Melissa, pero apartment iyon na may isang kuwarto na tinutuluyan ng apat na pamilya. “Sa kabuuan, 15 tao kami, at may 18 o 19 na hayop,” sabi ni Melissa. “Natulog ang nanay ko sa Durango niya, pero siksikan pa rin sa apartment na iyon na parang 500 square feet. Buntis din ako noon, kaya sobrang hindi komportableng mamalagi roon. Alam kong kailangan kong umisip ng paraan.”

Pagbibigay ng lahat ng makakaya

Ilang araw matapos sumiklab ang Camp Fire, nakaupo si Cinde Dolphin sa simbahan habang nakikinig sa pastor niya na nagsasalita tungkol sa ideya ng pagbibigay sa lahat ng makakaya mo. “Sinasabi niya na hindi dapat mag-alangan at dapat mong gawing talagang makabuluhan ang buhay mo sa pamamagitan ng pagbibigay sa lahat ng maiaalok mo,” sabi ni Cinde na isang negosyante sa Sacramento, California.

Bilang matagal nang nagvo-volunteer, nakikibahagi na si Cinde sa mga samahang pangkabataan sa simbahan, may tinuturuan na siyang teenager na nasa foster care, at nag-oorganisa na siya ng mga paalmusal para sa mga walang tirahan, bukod sa iba pang proyekto. “Pero habang naririnig ko ang mga salita, naisip ko, ‘May malaking sunog na lumalamon sa kalapit na Butte County at hindi ko pa ibinibigay ang lahat ng makakaya ko.’ Magandang kontribusyon ang pagpapadala ng mga kumot at kamiseta, pero paano ako lubusang makakatulong sa pagbangon?”

Nakipag-ugnayan siya sa lokal na bumbero, at pinalapit nila siya sa Open Homes. Hindi pa nakapagpatuloy ng mga bisita sa Airbnb si Cinde, at inuupahan niya ang bahay niya sa Sacramento na mayroon ding guesthouse. Matapos payagan ng mga kasero niya, nilinis niya ang patuluyan at ini-list iyon sa page ng tulong sa sakuna ng Open Homes.

“Sa loob ng isang oras,” sabi ni Cinde, nakatanggap siya ng mensahe mula kay Melissa. “Hinding-hindi ko malilimutan ang pambungad na pangungusap: ‘Pagpalain ka ng Diyos.’ Pagkatapos, inilarawan ni [Melissa] ang pamilya niya: 11 taong gulang na anak niya, asawa niya, at biyenan niyang may kapansanan. Sabi niya, ‘Desperado na kami. Maliit na pamilya kami na may dalawang alagang aso. Alam naming posibleng maging problema iyon, pero kung ayos lang sa iyo iyon, ikalulugod naming mamalagi sa patuluyan mo. Buntis nga rin pala ako.’ Tagos sa puso ko ang buong sitwasyon—hindi ako naniniwalang may makakatanggi roon.”

Pagdedesisyon sa panahon ng kagipitan

Tumugon kaagad si Cinde, at dumating sa Sacramento ang pamilya ni Melissa pagkalipas ng wala pang 24 na oras. Dahil unang beses pa lang magho-host noon si Cinde, sari-sari ang mga emosyon niya. “Nag-aalala ako dahil noon lang ako magpapatuloy ng hindi ko kakilala. Bago ko buksan ang pinto, naisip ko, ‘Sana tama ang ginagawa ko. Babae ako at nakatira ako mag-isa sa bahay. Baka hindi tama itong gagawin ko…’ Pero pagkabukas ko sa pinto at pagkakita ko kay [Melissa], alam ko na kaagad na talagang tama ang ginagawa ko.”

Naaalala rin ni Melissa na kabado siya noon. “Hindi mo alam kung anong sitwasyon ang papasukin mo, at dahil nabigla at nayanig kami ng pangyayari noon, hirap kaming iproseso ang mga bagay-bagay,” sabi niya. “Pero dahil kay Cinde at sa pagsalubong niya nang nakangiti, gumaan ang pakiramdam namin at naging komportable kami. Alam mo sa unang tingin na magiliw siyang tao.”

Naghanda si Cinde para matulungan ang pamilya na maging komportable. Naglagay siya sa guesthouse ng malilinis na tuwalya, dalawang space heater, at mainit na tsokolate. “Inihanda ko lang kung ano ang posibleng pinakakinakailangan kapag lumilipat ka ng tirahan at iniisip mong ‘Ano na ang gagawin ko?’”

Nag-uusap sa text ang dalawang babae tungkol sa lohistika kaya alam na ni Melissa ang dapat asahan pagdating sa laki ng tuluyan. “Ipinaalam sa amin ni Cinde na masisikipan kami, pero ayos lang iyon sa kanya hangga't ayos lang iyon sa amin. At, siyempre, masosolusyunan natin iyon. May ekstrang pull-out bed at nakakatuwang maliit na banyo. Napaka-cute noon. Naramdaman naming parang tahanan na rin namin iyon.”

Gamit ang Facebook, sinabihan ni Cinde ang mga kaibigan niya na may mga bisita siyang nasunugan dahil sa Camp Fire. Nagluto ng hapunan ang mga kapitbahay niya, at nagdala ang mga kaibigan niya ng mga diaper, damit, at playpen para sa isisilang na sanggol. “Gusto talagang mag-abot ng tulong ng mga kaibigan ko,” sabi ni Cinde. “Sa palagay ko, mas mararamdaman ang epekto kung kilala mo ang pamilyang tinutulungan mo dahil gustong direktang malaman ng mga tao na may napapabuti silang buhay.”

Kahit tatlong araw lang namalagi ang pamilya ni Melissa bago sila nakahanap ng mas permanenteng apartment, nakapagpahinga at nakapagplano sila habang nasa patuluyan ni Cinde. “Akala ko malulumbay at balisa sila,” sabi ni Cinde. “Pero ang disposisyon nila ay ‘Salamat. Makakabangon din kami, at natutuwa kaming may matutuluyan kami para magawa iyon.’ Naging pagkakataon [iyon] para makapag-isip sila nang maayos, para mapagtanto nila na kung uunti-untiin mo, malalampasan mo ang lahat.”

Sama-samang pagbangon

Nakatira na ngayon ang pamilya ni Melissa sa isang apartment sa Carmichael na tinatayang 20 minuto ang layo kay Cinde. Ipinanganak si Annette limang araw pagkatapos nilang maglipat, at madalas mag-usap sa text sina Cinde at Melissa para magkuwentuhan tungkol sa buhay nila at magpadala ng mga litrato ng sanggol.

Kinuha kamakailan ni Cinde si Melissa para magturo tungkol sa produkto sa maliit na negosyo niya kung saan puwedeng magtrabaho nang part-time si Melissa habang nag-aalaga ng sanggol. Ayon kay Melissa, “Espesyal si Cinde. Malaki ang iniwan niyang marka sa buhay ko. Hinding-hindi ko malilimutan ang kabaitan niya at kahandaan niyang tumulong sa amin. Lagi pa rin siyang handang tumulong sa amin at mabilis siyang tumugon sa tuwing kailangan namin ng tulong.”

Pinag-iisipan pa nina Melissa at Trevor kung paano at kailan sila muling titira sa Paradise, pero ang pagbalik doon ang nilalayon nilang matupad kalaunan. “Hindi magkapareho ang pananaw ko sa konsepto ng tahanan bago at pagkatapos mangyari ang sunog,” sabi ni Melissa. “Para sa akin, kung nasaan ang pamilya mo, tahanan iyon. Puwede kang magkaroon ng tahanan kahit saan.”

Sumali sa lumalaking komunidad na walang pag-aatubiling nagbabahagi sa mga panahon ng pangangailangan.

Posibleng nagbago ang impormasyong nakasaad sa artikulong ito mula noong na‑publish ito.

Mga Katangi-tanging Feature

  • Noong sumiklab ang Camp Fire sa California, nag-sign up ang mga tao sa mga kalapit na komunidad para magkaloob ng pansamantalang matutuluyan sa pamamagitan ng programang Open Homes ng Airbnb

  • Nakahanap ng matutuluyan si Melissa at ang pamilya niya sa tulong ni Cinde na isang negosyante sa Sacramento

  • Nag-ambag din ang mga kapitbahay ni Cinde sa pagtulong sa pamilya ni Melissa, at magkaibigan pa rin ang dalawang babae

Airbnb
May 7, 2019
Nakatulong ba ito?