Pag-aayos ng iyong patuluyan para matuwa ang mga bisita

Pinapahalagahan ng mga bisita ang malinis at maayos na tuluyan. Nagpapatuloy ka man ng mga bisita sa pribadong kuwarto o buong tuluyan, subukan ang mga tip na ito ng mga host para sa pagliligpit ng mga kalat sa iyong patuluyan.

“Para sa akin, kapag mas kaunti ang nakalagay na gamit, mas malinis at mas maayos ang tuluyan,” sabi ni Kath na host sa Albany, Australia. Napakahalaga para sa mga bisita ang kalinisan. Ayon sa datos ng Airbnb, isa sa mga nangungunang dahilan ng negatibong review ang hindi malinis na tuluyan.

“Mahalagang bawasan ang mga kalat at gamit sa mga patag na patungan,” sabi nina Jay at Lynne na mga Superhost sa Blanco, Texas. “Lalo nitong napapadali ang paglilinis, nagkakaroon ng mapaglalagyan ng gamit ang mga bisita, at nakakatulong ito sa mga bisita na maiwasang may makalimutan dahil madaling mapapansin ng mga bisita kung may naiwan silang gamit kapag sinuri nila ang kuwarto bago umalis.”

Kailangan ng mga bisita ng mga mapaglalagyan ng kanilang mga damit, gamit sa banyo, at iba pang personal na gamit. Para makapagbakante ng ilang drawer at aparador, posibleng kailanganin mong mag-alis ng mga hindi kinakailangang gamit. “Kung isang taon mahigit ko nang hindi nagagamit o nasusuot iyon, itinatapon ko na iyon,” sabi ni Sarah na host sa Sayulita, Mexico.

Mainam na magbakante ng mas maraming espasyo lalo na kung nagpapatuloy ka ng mga bisita para sa mga pangmatagalang pamamalagi gaya ni Jessica na host sa Seoul, South Korea. “Sigurado akong magdadala sila ng mga libro, souvenir, litrato ng pamilya, at sarili nilang ‘kalat’ ng mga gamit na gusto nilang ilagay sa mesa sa tabi ng kama, mesang pantrabaho, o shelf,” sabi niya.

Pag-isipan ang pinakamagandang paraan ng paglalagay ng mga amenidad para madaling mahanap ng mga bisita ang mga iyon. May kabinet na nakalaan para sa mga bisita si Chantal na host sa Yvignac-la-Tour, France: “Naroon ang lahat ng pangunahing kailangan, gaya ng maliliit na bote ng tubig at toilet paper. Nakaayos at pinagbukod-bukod ayon sa kategorya ang lahat ng gamit sa mga shelf at basket.”

Kapag nakaayos na ang lahat, tandaang gumawa ng imbentaryo ng mga linen at iba pang kagamitan. I-donate o itapon ang anumang hindi na kagandahan.

“Hindi ko gusto kapag mukhang galing sa rummage sale o gamit na itinapon sa kung saan ang laman ng kusina sa listing,” sabi ni Alexandra na host sa Lincoln, California.

Ihanda ang mga totoong kailangan ng mga bisita sa kusina at mga banyo at alisin ang iba pang gamit. Matutuwa ang karamihan ng mga bisita sa mga gamit na gaya ng pambukas ng bote at hair conditioner pero hindi nila kailangan ng tatlong uri ng bawat gamit.

Maaaring maisip mo na mas mainam kung itatabi ang mga naiwan ng naunang bisita para magamit ng mga susunod na bisita pero hindi iyon magandang ideya. Nagtatabi lang si Michelle na host sa Chicago ng “selyado gaya ng pagkakabili” na pagkain at inumin, tulad ng “bottled water, soft drinks, at mga pampalasang pang-isahang gamit.”

“May silbi dapat ang lahat ng nakalagay sa kuwarto,” sabi ni Kelly na host sa Austin, Texas. “Hindi ito nangangahulugan na hindi na puwedeng lagyan ng estilo o gawing kaaya-aya at maaliwalas ang kuwarto.”

Nakadepende sa tuluyan ang tamang balanse ng makabuluhan at maaliwalas pero narito ang ilang pangunahing tip na dapat isaalang-alang:

• Iwasan ang mga masyadong personal na detalye. Huwag maglagay sa mga bahaging para sa mga bisita ng mga bagay na gaya ng mga litrato ng iyong pamilya, artwork ng mga anak mo, at damit at sapatos.
• Nakakatuwa ang pagkakaroon ng katangian. Puwedeng maglagay ng naka-frame na lokal na obra ng sining, kakaibang muwebles, o pambihirang salamin para mamukod-tangi ang iyong patuluyan.
• Maglagay ng ilang dekorasyon. Maipaparamdam ang pagiging tahanan ng iyong patuluyan kapag naglagay ng mga bagay na gaya ng mga halaman at unan hangga't pili lang ang ilalagay at pag-iisipan ang pagkakaayos ng mga iyon.