Paano mapigilan ang mga potensyal na problema sa pagho-host

Ibinahagi ng Superhost na si Diana ang mga tip niya para sa pagtugon sa mga potensyal na problemang maaaring maranasan bilang host.
Ni Airbnb noong Dis 11, 2019
4 na minutong video
Na-update noong Ago 25, 2022

Mga Katangi-tanging Feature

  • Maghanda ng impormasyon sa pakikipag-ugnayan ng tubero, electrician, at co-host para mapadali ang paglutas ng problema

  • Nakakatulong ang regular na pagpapanatili para mapanatiling maayos ang iyong patuluyan

  • Makakatulong ang malinaw na pakikipag-ugnayan at pakikiramay para maiwasan at mapangasiwaan mo ang mga problema

Sa kabila ng mga pagsisikap mo, sadyang nagkakaroon ng mga problema minsan. Posibleng hindi mahanap ng bisita ang susi na iniwan mo para sa kanya, o nagkaroon ng bara sa mga tubo. Napakabihira mang makaranas ng malaking isyu, nagpaplano pa rin para sa hindi inaasahan ang magagaling na host.

Ganito ang rekomendasyon ni Diana, isang Superhost mula sa Oakland, California, sa pangangasiwa ng mahihirap na karanasan sa pagho-host.

1. Kumuha ng team ng suporta

Mahalaga ang komunidad sa pagho-host, at kabilang sa komunidad na iyon ang mga taong tumutulong para mapatakbo nang maayos ang iyong negosyong pagho-host.

“May nakahanda kaming mga pangalan at numero ng tubero, electrician, at tagalinis ng bahay,” sabi ni Diana. At kapag wala si Diana, may kapatid siyang matatawagan bilang panghaliling host. “Lagi kaming may solusyon kapag may problema.”

May nakahanda kaming mga pangalan at numero ng tubero, electrician, at tagalinis ng bahay.
Diana,
Oakland, California

2. Magsagawa ng regular na pagpapanatili

Mas may gaganda pa ba sa pagiging handang ayusin nang mabilis ang may tagas na tubo o sirang heater? Oo. Ang pagtiyak na hindi iyon mangyayari.

“Mayroon akong checklist sa pagpapanatili na sinusuri ko kada taon,” sabi ni Diana. “Ako mismo ang gumagawa ng ilan sa mga gawaing ito, at pinapagawa ko sa mga propesyonal ang iba pa. Iba-iba ang bawat tuluyan, pero mahalagang tukuyin kung ano ang kailangan para mapanatiling maayos ang tuluyan mo para sa mga bisita.”

Kabilang sa taunang checklist sa pagpapanatili ni Diana ang:

  • Paglilinis ng mga dahon at iba pang dumi sa mga alulod
  • Pagtiyak na gumagana nang maayos ang lahat ng heating, bentilasyon, at air conditioning
  • Paglilinis ng mga skylight na mahirap abutin para panatilihing maliwanag ang patuluyan niya

3. Gawing priyoridad ang pakikipag-ugnayan

Mahalaga ang pagiging matapat at makatotohanan para sa epektibong pakikipag-ugnayan sa mga bisita.

“Sa palagay ko, mahalagang hindi mangako ng labis pero dapat palaging makipag-ugnayan nang malinaw,” sabi ni Diana. “Kahit na wala pa akong natutukoy na solusyon, ipinapaalam ko sa bisita kung ano ang ginagawa ko.”

Kaya noong may tumagas na tubo bago mismo dumating ang isang bisita, sinagot agad ni Diana ang telepono.

“Tinawagan ko ang bisita at ipinaalam ko sa kanya na inaasikaso ko na ang sitwasyon, at tinanong namin kung puwedeng iurong ang oras ng pag-check in niya,” sabi ni Diana. “Nag-alok din ako ng mas late na pag-check out, na nagustuhan niya, at nagbigay ako ng isang bote ng wine at note ng pasasalamat. Para sa maraming bisita, malaking bagay ang malinaw na pakikipag-ugnayan at pagpapasalamat—sa pamamagitan man ng wine o gift card sa lokal na coffee shop.”

Sa palagay ko, mahalagang hindi mangako ng labis pero dapat palaging makipag-ugnayan nang malinaw.
Diana,
Oakland, California

4. Makinig at makiramay

“May mga komplikadong pinto sa patuluyan namin na kadalasang hindi alam ng mga bisita kung paano buksan, kahit na naglagay na kami ng mga tagubilin sa aming manwal ng tuluyan at mga tagubilin sa pag-check in,” sabi ni Diana. “Kapag nangyayari ito, palagi kong pinapakinggan ang mga hinaing nila at mahinahon ko silang gagabayan dito sa pamamagitan ng telepono o sa personal.”

Ilang bagay na natutunan ni Diana sa ilang taon ng pakikinig sa kanyang mga bisita:

  • Magbigay ng paraan ng pagpasok nang walang kinakailangang susi para mapadali ang pag-check in
  • Maglaan ng sapat na ilaw sa labas para matulungang manatiling ligtas ang mga bisitang darating kapag madilim
  • Upfront na hingin ang impormasyon sa pagbibiyahe at linawin ang oras ng pag-check in at pag-check out
Talagang napakahalaga ng pakikinig, pag-unawa, at pagpapakatao.
Diana,
Oakland, California

5. Paghandaan ang mga karaniwang sanhi ng problema

Puwedeng magkaproblema dahil sa maagang pagdating ng bisita, late na pag-check out, at mga isyu sa paglilinis. Narito ang ilang ideya para maiwasan ang mga potensyal na isyu:

  • Magbigay ng malinaw na oras ng pag-check in at pag-check out at ng dahilan para sa mga ito (“Huwag mag-check in nang mas maaga sa 3:00 PM para maihanda ng mga tagalinis ang iyong kuwarto”)
  • Itakda ang iyong mga preperensiya sa pagpapareserba para makapaglaan ng mas mahabang panahon para sa paglilinis
  • Pag-isipang ialok na itabi ang bagahe ng mga bisita kung alam mong darating sila nang maaga
  • Magsama ng mahahalagang detalye—kung paano pumunta sa iyong patuluyan, kung ano ang hitsura ng patuluyan, atbp.—sa paglalarawan ng listing at mga tagubilin sa pag-check in para makatulong na maitakda ang mga dapat asahan
  • Magbigay ng manwal ng tuluyan na naglalaman ng mga tagubilin para sa pag-access ng wifi at paggamit ng mga kasangkapang mahirap gamitin

Kapag naghanda ka para sa mga potensyal na problema, mas malamang na makapagbigay ka ng magandang karanasan para sa bisita.

At kung may mga tanong ka pa o kung magkaproblema ka, puwede kang makipag-ugnayan sa amin para sa tulong.

Hindi empleyado ng Airbnb si Diana at hindi siya nagtatrabaho sa ilalim ng pamamahala ng Airbnb. Bilang host na creator, nakipagtulungan siya sa Airbnb para maisulat ang mga iniisip niya at gawin ang video na ito. Ang anumang opinyon, kuwento, o pahayag na testimonya ay totoo, kanya mismo, at hindi mga opisyal na pahayag ng Airbnb.

Mga Katangi-tanging Feature

  • Maghanda ng impormasyon sa pakikipag-ugnayan ng tubero, electrician, at co-host para mapadali ang paglutas ng problema

  • Nakakatulong ang regular na pagpapanatili para mapanatiling maayos ang iyong patuluyan

  • Makakatulong ang malinaw na pakikipag-ugnayan at pakikiramay para maiwasan at mapangasiwaan mo ang mga problema

Airbnb
Dis 11, 2019
Nakatulong ba ito?